p. 209

Coronacio regine Boemie

Anno Domini millesimo quadringentesimo feria secunda post Reminiscere illustrissima princeps et domina, domina Zophia, ducis Bavororum Iohannis filia, invictissimi principis et domini, domini Wenceslai, Romanorum et Boemie regis conthoralis legitima, coronata fuit in castro Pragensi ante altare sancti Viti.

Que coronacio sic processit, quod ex mandato predicti regis Wenceslai consules et scabini, iurati cives Maioris civitatis Pragensis cum prothonotario et notariis ipsorum indumentis brunatici coloris vestiti fuerint de Bruxellis, qui consules sic uno colore vestiti cum communitate et senioribus dicte civitatis et candelis czecharum et artificum universis ascenderunt ecclesiam Pragensem circum chorum sancti Viti. Demum consules, quilibet habens baculum deargentatum in manu et cirothecas novas, vocati per Borziwogium militem, dicte regine magistrum curie, in pallacium regium castri Pragensis, ibi interfuerunt Sigismundus, rex Ungarie, et Iodocus, marchio Moravie, burggravius Nurembergensis et ceteri principes et barones regni Boemie, dominus Wenceslaus, patriarcha Anthiocenus et prepositus Wissegradensis, dominus Wolfframus, archiepiscopus Pragensis et apostolice sedis legatus, dominus Iohannes, episcopus Leuthomisslensis, ceteri episcopi et abbates infulati regni Boemie.

Ibi mandatum fuit civibus et communitati Maioris civitatis Pragensis, ut facta processione primi procederent ante omnes abbates et principes regni Boemie cum baculis ipsorum, qui ante omnes transierunt in processione. Demum abbates cum ipsorum baculis et infulis, demum episcopi. Postremo vero Zophia discrinato capite in crinali decenti de margaritis, induta vestibusp. 210 pontiﬁcalibus et sandaliis et cappa deaurata sub celo sive tectura deaurata, quod celum portarunt barones Boemie, quidam Ulricus Hass et alii secum, coronam vero, qua debuit coronari, portavit dominus Henricus de Rosemberk, ceptrum dominus Berka de Hoenstein, pomum cum cruce portavit dominus Iohannes de Michelsperg, qua processione facta cum ﬁstulatoribus et thubicenis et candelis ardentibus in chorum sancti Viti conducta fuit, ibi ab una parte fuit abbatissa sancti Georgii, ab alia relicta quondam ducis Iohannis Gorlicensis et de Lausicz etc. cum rege Ungarie et marchione Moravie, patriarcha, episcopo Leuthomislensi, aliis episcopis et abbatibus ibi circumstantibus et principibus.

Incepta fuit missa cantata. Ibi magister Iohannes Zophista in ydeomate Boemicali fecit ante exhortacionem, exponens insignia regalia, coronam, lapides preciosos, ceptrum et pomum. Ibi introitum Dum sanctiﬁcatus fuero etc. per dominum Wolfframum archiepiscopum, domino Iohanne Kbel, decretorum doctore, ofﬁciali Pragensi, et domino Wenceslao, decano ecclesie sancti Appollinaris, ministrantibus, ubi dominus officialis epistolam cantavit et dominus Wenceslaus ewangelium. Ceterum ante leccionem ewangelii dominus archiepiscopus accepit crisma sanctum et crismavit sibi pectus facta cruce et in dorso, quia tunica erat ipsius sic sartita, ut ante in pectore et retro in dorso erat aperta. Demum corona super caput inposita, que fuit recepta de altari et de capite sancti Viti, ibi tubicene et fistulatores insonuerunt, tunc ewangelio lecto fuit ducta super thronum factum supra altare sancti Viti cum pannis preciosis deauratis.

Demum incepto offertorio descendit de throno et obtulit in quodam cantro argenteo vinum et panem et alii, scilicet rex Ungarie, marchio Moravie et alii barones Boemie obtulerunt ad altare quilibet iuxta libitum voluntatis. Demum loco pacis episcopus Leuthomislensis et patriarcha accepto capite sancti Viti supra thronum portarunt ad osculum faciendum. Demum communione facta per archiepiscopum regina de throno ﬂectens ad altare sancti Viti accepit corpus et sanguinem Domini nostri Iesu Christi, sic tamen quod per totum officium illius misse dominus Henricus de Rosemberg et dominus Brzenko de Skal tenuerunt coronam super caput ipsius, non permittentes caput pertingere, quia corona aurea ornata lapidibus et margaritis gravis fuit, sed sic capillis discrinatis stetit et sedit audiendo officium misse predicte.

Hiis peractis fistulatores et thubicene insonuerunt et iterum consules Maioris civitatis Pragensis et communitas conduxerunt eam sic coronatam cum principibus, abbatibus, episcopis, rege Ungarie, marchione Moravie, burggravio de Nuremberga et aliis in pallacium regium, ibi sub throno preparato resedit cum solempnitate et pransa fuit. Ibi cives consules Maioris civitatis Pragensis, consules Nove civitatis et Minoris civitatis Pragensis et alii cum omnibus servitoribus suis commederunt solempniter. Ibi vina, pisces et alia sufficienter in habundacia magna fuerunt data et oblata.

Korunovace české královny

Obsah