165ra

Oracio Augustini

Magnus es, Domine, et laudabilis valde. Magna virtus tua, et sapiencie tue non est numerus. Laudare te vult homo, aliqua porcio creature tue. Tu excitas, ut laudare te delectet, et inquietum est cor nostrum, donec requiescat in te. Effunde super me misericordiam tuam [ms. meam]. Erige me, collige me, imple me totum toto te.

Erravi sicud ovis, que periit. Quere servum tuum. Da michi, ut venias in cor meum, et inebries illud, ut obliviscar mala mea et unum bonum meum amplectar te. Dic michi per miseraciones tuas, Domine, Deus meus, dic michi: Salus tua ego sum. Noli abscondere a me faciem tuam.

Angusta est domus anime mee, quo venias ad eam, dilatetur abs te. Ruinosa est, refice eam. Habet, que offendant oculos tuos; fateor et scio. Defluxi ego abs te et erravi, Deus meus, nimis devius a stabilitate tua, in adolescencia mea factus sum michi regio egestatis. Recordor transactas feditates meas, carnales corrupciones anime mee. Recolo vias meas nequissimas in amaritudine recordacionis mee. Quis ego, Domine? Qualis ego? Quid non mali aut facta mea aut, si non dicta, voluntas mea fuit? Peccavi omnibus modis peccandi, in omni abusione gracie tue, in omni pollucione anime et corporis. Multa sunt et innumerabilia peccata mea, multi et magni labores anime mee. Sed maior est medicina tua. Tibi, Domine, cuius oculis nuda est abyssus humane consciencie, confiteor peccata mea. Confessio mea in conspectu tuo tibi tacite fit et non tacite. Tacet strepitu, clamat affectu.

Tibi, Domine, manifestus sum ego, miser sum ego et homo peccator. Et cui alteri preter te clamabo? Ab occultis meis munda me, et ab alienis parce servo tuo. Confiteor adversum me delicta mea, ut tu remittas impietatem peccati mei. Si iniquitates observaveris, domine, domine, quis sustinebit? Parce peccatis meis et dele omnes iniquitates meas. Medicus es. Eger sum. Misericors es. Miser sum. Cognovi, Domine, cognovi, quia temptacio sit vita humana super terram. Temptamur temptacionibus cottidianis, domine, sine cessacione temptamur. Cottidiana fornax nostra est lingua humana....

Augustinova modlitba

Obsah